தங்கநிலா

THAMPALAKAMAM PHOTOS

2010-10-09T23:27:00.000-07:00

Thampalakamam is a village in the Trincomalee District of Sri Lanka and it is located about 20 km South-West of Trincomalee.

வள்ளுவர்

2010-02-26T15:18:00.000-08:00

வள்ளுவராம் வள்ளுவர்
வான் புகழ் கொண்டவர்
தெள்ளு தமிழ் மொழியிலே
தீங் கவிதை தந்தவர்.

அறம் பொருள் இன்பத்தை
அகிலம் போற்றச் செய்தவர்
திறமை கொண்ட நூலினை
தேசம் போற்றச் செய்தவர்.

தமிழ் வேதம் சொன்னவர்
தரணி போற்றும் நாயகர்
அமிழ்தம் போன்ற தமிழினை
அகிலம் புகழச் செய்தவர்

கல்விதான் கண்ணெனக்
கடிந்து நமக்குச் சொன்னவர்.
சொல்லும் செயலு மொன்றெனத்
தூயராக வாழ்ந்தவர்.

முயற்சி யொன்றே மனிதனை
முழுமையாக்கும் என்றவர்
உயர்ச்சி வாழ்வில் அடையவே
உரிய வழிகள்உரைத்தவர்.

வள்ளுவரைப் போற்றுவோம்
வளரும் தமிழை நேசிப்போம்
உள்ளம் உயர முயற்சிப்போம்
உலகம் போற்ற வாழலாம்.

.

காந்தி

2010-02-23T16:38:00.000-08:00

காந்தி எங்கள் காந்தியாம்

கருணை நிறைந்த காந்தியாம்

சாந்தி உலகில் தழைக்கவே

தன்னைத் தந்த காந்தியாம்

உண்மை பேசி உலகையே

உயர்த்த வந்த காந்தியாம்

அண்ணல் எங்கள் காந்தியாம்

ஆற்றல் மிக்க காந்தியாம்

சத்தியத்தைக் கடைப்பிடித்து

தர்ம ம் காத்த காந்தியாம்

நித்திய வாழ்வு பெற்ற எங்கள்

நேசர் தீரர் காந்தியாம்

மனித தெய்வமாக வந்த

வள்ளல் எங்கள் காந்தியாம்

புண்ணிய சீலர் புகழ் படைத்த

புனிதர் எங்கள் காந்தியாம்

மானுடத்தை வளர்த்த எங்கள்

மாமனிதர் காந்தியாம்

பகைவனுக்கும் அருள் சுரந்த

பரமர் எங்கள் காந்தியாம்

சர்வ மதம் போற்ற வந்த

சத்யர் எங்கள் காந்தியாம்

சித்த புருசர் உலகம் போற்றும்

சீலர் எங்கள் காந்தியாம்.

கணிதம் கற்று உயர்வாய் - Voice Blog

2010-02-14T06:51:00.000-08:00

Comment | Copy This

வளங்கள் பெற்று மகிழலாம்.

2010-02-12T10:37:00.000-08:00

செல்வம் சேர்க்க வழிகளின்றித்

திரியும் எங்கள் தோழரே

செல்வம் சேர்க்கும் வழிகள் பல

செப்புகிறேன் கேளுங்கள்.

தோட்டம் செய்து வாழ்க்கையின்

துயரைப்போக்க முடியும் நாம்

நாட்டம் அதில் கொள்வமே!

நாமும் உயர வாய்ப்புண்டே

பன்ன வேலை செய்வமே

பாய் இழைத்து விற்பமே

சின்னச் சின்னத் தொழில்களால்

செல்வம் சிறையச் சேர்க்கலாம்

பழ ரசங்கள் காய்ச்சலாம்

பாற் பண்ணைகள் வைக்கலாம்

அழகு சாதனங்கள் செய்து

அற்புதமாய் விற்கலாம்.

தொழில்களெல்லாம் சம மென்று

துணிந்து நின்று பாடுவோம்

வழிகள் பல நமக்குண்டு

வழங்கள் பெற்று மகிழலாம்.

ஒருவர் உழைப்பை நம்பி நாம்

உணர்வு கெட்டு வாழ்வதோ?

அனைவருமே உழைத்திங்கு

ஆற்றல்பெற்று வாழலாம்.

யப்பான் நாட்டு மக்கள் போல்

நாமும் வாழப் பழகுவோம்

எப்பொழுதும் முயற்சியில்

ஈடு பட்டு உயருவோம்.

கற்று உயர்வு காண்பாய்

2010-01-30T20:57:00.000-08:00

ஒன்று ஒன்று ஒன்று -இந்த

உலகில் தெய்வம் ஒன்று

ஒன்றும் ஒன்றும் இரண்டு-இந்த

உண்மை புரிந்து பாடு

இரண்டும் ஒன்றும் மூன்று எங்கள்

இனிய தமிழ் மூன்று

மூன்றும் ஒன்றும் நான்கு நல்

மறைகள் உலகில் நான்கு

நான்கும் ஒன்றும் ஐந்து ஒரு

கையில் விரல்கள் ஐந்து

ஐந்தும் ஒன்றும் ஆறு திருக்

குமரன் முகங்கள் ஆறு

ஆறும் ஒன்றும் ஏழு இதை

அறிந்து கொண்டு வாழு

ஏழும்ஒன்றும் எட்டு

எங்கே எனக்கு லட்டு

எட்டும் ஒன்றும் ஒன்பது

நவ ரத்தினங்கள் ஒன்பது

ஒன்பதும் ஒன்றும் பத்து

இராவணன் தலைகள் பத்து.

எண்ணும் எழுத்தும் உலகில்

என்றும் நிலைத்து வாழும்

கண்ணும் கருத்து மாக இதைக்

கற்று உயர்வு காண்போம்

கணிதம் என்ற பாடம்

கற்று உலகில் தேற

துணிவு வேண்டும் மகனே!!

துயரங் கொள்ள வேண்டா.

எண்ணம் வலிமை பெற்றால்

எழுச்சி யுண்டு மகனே!

எண்ணத்தாலே எதையும்

எழுதில் கொள்ள முடியும்

மனதில் வலிமை சேர்ந்தால்

மகிழ்ச்சி உண்டு மகனே!

சினத்தை விட்டு நீயும்

சிரத்தையோடு கற்ப்பாய்

எண்ணும் எழுத்தும் உலகில்

ஏற்றம் காணச்செய்யும்

கண்ணின் மணியே நீயும்

கற்று உயர்வு காண்பாய்.

உன்னால் முடியும் தம்பி.

2009-12-30T18:25:00.000-08:00

உன் னால் முடியும் தம்பி -நீ

உணர்ந்து கொள்ளு தம்பி

கண்போ லாகும் கல்வி-நீ

கற்று உயரு தம்பி

அரிய பெரிய சக்தி-உன்

அகத்தில் உண்டு தம்பி

இதனைப் புரிந்து கொண்டால்-நீ

ஏற்றம் பெறுவாய் தம்பி

உனக்குள் உள்ள ஒன்றே -இந்த

உலகை யாழும் சக்தி

மனத்தினாலே உணர்ந்து -நீ

வாழ்வில் வெற்றி கொள்ளு

உலகில் வாழ்ந்த பெரியோர்-இதை

உணர்ந்து வாழ்வை வென்றார்

பல்கலையும் கற்று -இந்தப்

பாரில் புகழைப் பதித்தார்

முடியும் என்று துணிந்து -நீ

முயல வேண்டும் எதிலும

படியும் அதிலே மனது -நீ

பார் புகழ உயர்வாய்

இறைவன் எமக்குத் தந்த

இணையில்லாத செல்வம்

நிறைந்த மனது தம்பி

நீ அறியவேண்டும் தம்பி

இதயம் என்ற வயலில்-நீ

எதையும் கேட்டுப் பெறலாம்

உதயமாகும் வாழ்வு இதை

உணர்தால் வெற்றி தம்பி

எண்ணம் வலிமை பெற்றால்

ஏற்ற முண்டு தம்பி

திண்ணமாக வெற்றி -எம்மைத்

தேடி வரும் தம்பி

இனியும் தயக்க மேனோ?-நீ

ஏற்றம் காண வேண்டும்

துளியும் தயக்க மின்றி-நீ

துணிந்து வாழு தம்பி.

கீர்த்தி புகழ் தேடு

2009-12-23T17:09:00.000-08:00

பாடு தம்பி பாடு

பைந்தமிழில் பாடு

வீடு செல்வம் வேண்டும்

வியர்வை சிந்தத்தேடு

நாடு தம்பி நாடு

நம் உயிரினிய நாடு

காடு நீக்கி கழனியாக்கிக்

காணவேண்டும் ஓடு

தேடு தம்பி தேடு

திரவியங்கள் தேடு

ஏடு போற்றி வாழ நல்ல

இலக்கியங்கள் தேடு

சாடு தம்பி சாடு

சாதிப்பேயைச் சாடு

பாடு பட்டால் உண்டு வாழ்வு

பார் புகழப் பாடு

ஓடு தம்பி ஓடு

உயர்வு பெற ஓடு

கேடு இல்லா வாழ்க்கையோடு

கீர்த்தி புகழ் தேடு.

தரணி போற்றச் செய்வோம்

2009-12-22T12:06:00.000-08:00

அன்னை மொழியின் பெருமை நீ

அறிய வேண்டும் தம்பி

அன்னைத் தமிழைப் போற்றி நாம்

ஆட்சி அமைப்போம் தம்பி.

சங்க காலக் கவிதைகளின்

சங்கதிகள் அறிவோம்

எங்கள் தமிழின் பெருமையை

இணைந்து பாடி மகிழ்வோம்.

சிலம்பு பேசும் இளங்கோவின்

சிறப்புக் கண்டு மகிழ்வோம்

நலங்கள் ஓங்கும் கலித்தொகையின்

நயங்கள் பேசி மகிழ்வோமே.

கம்ப நாடார் கவிதைகளில்

நயங்கள் காண வேண்டும்

காவியங்கள் கற்றுத் தமிழில்

கனிவு கொள்ள வேண்டுமே.

வள்ளுவரின் குறளில் காணும்

வளங்கள் கண்டு மகிழ்வோம்.

தெள்ளு தமிழின் புகழை இந்தத்

தேசம் போற்றச் செய்வோம்.

எழுச்சி பொங்கும் பாரதியின்

இனிய கவிதை படிப்போம்

புரட்சிக் கவியின் மொழியிலே

புதுமை காண்போம் தம்பி.

வளங்கள் நிறைந்த தமிழின்

வண்ணம் காண்போம் தம்பி

களங்கள் அமைத்து எங்கள்

கன்னித் தமிழை வளர்ப்போம்.

இணையத்தோடு இணைந்து

இன்பத் தமிழை உலகில்

முதன்மையாக வைக்க நாம்

முயல வேண்டும் தம்பி.

கணனிக் கல்வி கற்று

கன்னித் தமிழை வளர்ப்போம்

நினைவு நல்ல தாயின் புகழ்

நீண்டு உயரும் தம்பி.

புதிய தமிழின் ஊடே நாம்

புரிய வேண்டும் புரட்சி

சங்கம் வளர்த்த தமிழை

தரணி போற்றச் செய்வோம்.

ஆழ் கடலைப்பாருங்கோ

2009-12-17T17:05:00.000-08:00

ஆழ் கடலைப்பாருங்கோ

ஆகா என்ன அழகிது

நீல நிறமானது

நீண்டு பரந்து தோன்றுது

அலைகள் வந்து மோதியே

அழகழகாய்த் தோன்றுது

வலைகள் வீசிப்பரதவர்

வாழ்க்கை நடத்த உதவுது.

மீன்கள் துள்ளி பாய்கின்ற

வேகம் என்ன வேகமோ?

வானில் அலையும் மேகத்தை

தழுவ ஆவல் கொண்டதோ?

தோணிகளில் அமர்ந்து அந்த

துணிவு மிக்க மீனவர்

கோணிப் பைகளில் மீன்களைப்

கோலிப் போடும் அழகைப்பார்!.

பாய் விரித்த படகுகளில்

வலை விரித்த பரதவர்

சாயும் பொழுதில் ஒன்று கூடி

மீன் பிடிக்கும் அழகைப்பார்!.

பகலவனும் ஆழ் கடலில்

பாதி மறைந்து செல்வதேன்?

அவனும் மீன் பிடிக்கவோ

ஆழ் கடலில் மூழ்கிறான்?.

சுனாமி என்ற கொடியவன்
தோன்றிக் கடலில் துஷ்டனாய்
விரோதி போல எம்மையே
அழித்த கதை அறிவோமே.

கடலைப் பார்த்து அன்று நாம்
கவிதை பாடி மகிழ்தோமே
கடலின் கொடுமை கேட்டின்று
கலங்கி அழுது வாழ்கிறோம்.

கடல்களின்றி உலகிலே
காவியங்கள் தோன்றுமா?
உடல்கள் வாழ முடியுமா?
ஊர்கள் செழிக்க முடியுமா?

இயற்கை நமது வாழ்க்கையை
ஏற்றம் காணச் செய்யுமே

எதற்கும் கடலில் கவனமாய்

இறங்கி வாழப் பழகுவோம்.

சுனாமி தோன்றும் வழிகளைத்
துரிதமாக அறிந்து நாம்
கவனமாக வாழ்ந்திட்டால்
கடலைக் கண்டு அச்சமேன்?

வேதகால ஆசிரியர்களின் பத்துக் கட்டளைகள்

2009-09-05T07:55:00.000-07:00

கல்வியை முடித்து வெளியேறும் மாணாக்கர்களுக்கு வேதகால ஆசிரியர்கள் பத்துக் கட்டளைகளை அறிவுறுத்தியுள்ளனர்.

அவையாவன.

1. உண்மையைக் கடைப்பிடி.
2. நேர்மையாய் இரு.
3. நன்மைதரும் செயல்களில் ஈடுபடு.
4. செல்வத்தைத் தேடு.
5. இறைவனையும் முன்னோரையும் வழிபடு.
6. பெற்றோர் பிறர் நலனில் அக்கறை கொள்.
7. கற்றலையும் கற்பித்தலையும் கைக்கொள்.
8. அல்லலை அகற்றி நல்லவை செய்.
9. முழுமனதுடன் அறவழியில் மனித நேயமுடன் வாரி வழங்கு.
10.வாழ்க்கையில் சவால்களை எதிர் கொள்.

எங்கள் ஊர்

2009-08-24T07:38:00.000-07:00

தம்பை ஊர் எங்கள் ஊர்

தமிழர் ஒன்றாய் வாழும் ஊர்

தும்பை மலர் சூடும் கோணைத்

தூயவன் வாழ் தம்பை ஊர்

வளங் கொழிக்கும் எங்கள் ஊர்

வயல்கள் சூழ்ந்த தம்பை ஊர்

கந்தளைக் குளம் பாய்ச்சும்

கழனி சூழ்ந்த தம்பை ஊர்

வரலாறு கண்ட ஊர்

வரராமன் ஆண்ட ஊர்

பேராறு வளஞ் சேர்க்கும்

பெருமை கொண்ட எங்கள் ஊர்

பச்சைப் பசேலென

பார்க்கும் இடங்க ளெல்லாம்

இச்சை கொள்ளச் செய்யும் ஊர்

எழில் கொஞ்சும் தம்பை ஊர்

மாதுமை மனம் மகிழ்ந்து

வாழும் ஊர் எங்கள் ஊர்

வேதனைகள் அற்ற ஊர்

விவசாயம் செழிக்கும் ஊர்

திடல் திடலாய் அமைந்த ஊர்

தீந்தமிழர் வாழும் ஊர்

உடல் தமிழுக் கென்று சொல்லும்

உத்தமர்கள் நிறைந்த ஊர்

புலவர்கள் வாழ்ந்த ஊர்

புதுமை பல கண்ட ஊர்

தலம் சிறந்த எங்கள் ஊர்

தம்பை ஊர் எங்கள் ஊர்

குளக்கோட்டன் அமைத்த ஊர்

குறு மன்னர் ஆண்ட ஊர்

வளம் நிறைந்த எங்கள் ஊர்

வயல்கள் சூழ்ந்த தம்பை ஊர்

Deepest Sympathy

2009-08-17T20:35:00.000-07:00

Mr. Asaippillai Sivalingam of Kopay has passed away on 16.08.2009 at his residence at Kopay. He held several posts in the Srilankan State Service and also worked as an Engineer in the OFFER Ceylon, Trincomalee. He was the former president of Sri Sathya Sai Seva Samithy, Trincomalee and very devoted devotee of Bhagawan Sathiya Sai Baba for a long period.

He is leaving behind his wife and two sons. May his sou and rest in the lotus feet of Bhagawan Baba.

எவ்வாறு அமைதி கொள்ளும் ?

2009-06-03T12:44:00.000-07:00

அமரர் தம்பலகாமம்.க.வேலாயுதம்

பைந்தமிழ் மொழியில் வல்ல
பாவலா! தம்பை தந்த
செந்தமிழ் போற்றும் எங்கள்
தீந்தமிழ் கவிஞர் கோனே!
எந்தையே தமிழை உன்றன்
இறையெனப் போற்றி வாழ்ந்த
விந்தையை எண்ணி நாங்கள்

வியப்பினில் ஆழ்வதுண்டு

கற்றதோ கை மண் அளவு

காவியம் ஆக்கும் திறனை

பெற்றதோ எவ்வா றென்றறியாப்

பிதற்றுவர் உண்மை அறியார்

வாசிக்கும் திறனே உன்றன்

வளர்ச்சிக்கு உந்து கோலாம்

நேசிக்கும் தமிழைப்போற்றி

நெஞ்சினில் நிறைந்தாய் ஐயா

ஆதியாம் கோணை நாதன்

அன்பனாய் நீடு வாழ்ந்தாய்

பதிக்மும் பாடி ஈசன்

பக்கதனாய் மகிழ்ந்திருந்தாய்

ஊதியம் கருதா தென்ற

உணர் வுயர்க் கவிதையாலே

இயற்கையின் நுட்பங்களை

எடுத்து நீ இயம்பினாயே

வரலாற்று நாவல் மற்றும்

வளமுறு சமூக நாவல்

இதயத்தை வருடிச் செல்லும்

இதமான சிறுகதைகள்

சுவையான கவிதை நூறு

தொடரான கட்டுரைகள்

இவையாவும் தந்த எங்கள்

இறைவா நீ ஏன் பிரிந்தாய்?

தொண்ணூற்றி யிரண் டகவை

தொல்லைகள் எது்வுமின்றி

பண்ணோடு பசுமையான

பல்கலைத் துறைகளோடும்

கண்போல எம்மைக்காத்த

காவலா உன் பிரிவை

எண்ணியே எங்கள் நெஞ்சம்

எவ்வாறு அமைதி கொள்ளும் ?

வே.தங்கராசா

அமரர் தம்பலகாமம்.க.வேலாயுதம் அவர்கள் பற்றி அறிய http://vellautham.blogspot.com/

துயர்பகிர்வு

2009-05-19T04:46:00.000-07:00

திருகோணமலை மாவட்டத்தின் மூத்த எழுத்தாளரும், வீரகேசரிப் பத்திரிகையில் 50 வருடங்களுக்கு மேலாக நிருபராக அனைவரும் பாராட்டும் வகையில் கடமையாற்றியவருமான . தம்பலகாமம்.க.வேலாயுதம் அவர்கள் 19.05.2009 செவ்வாய்க்கிழமை இன்று அதிகாலை காலம் ஆனார்.

அன்னாரின் ஈமைக்கிரிகைகள் இன்று(19.05.09) தம்பலகாமம் குஞ்சடப்பன்திடலில் உள்ள அவரது இல்லத்தில் இடம்பெற்று பிற்பகல் நான்கு மணியளவில் நல்லடக்கத்துக்காக முள்ளியடி மயானத்துக்கு எடுத்துச் செல்லப்படும்.

இவ் அறிவித்தலை உற்றார், உறவினர், நண்பர்கள் அனைவரும் ஏற்றுக்கொள்ளுமாறு கேட்டுக்கொள்கின்றோம்.

தகவல் மகன் வே.தங்கராசா

அன்பு

2009-04-26T20:56:00.000-07:00

அன்பு செய்வோம் பிள்ளைகாள்
ஆகா ஓடி வாருங்கள்
அன்பு தெய்வ மாகுமே
அதனை அறிந்து போற்றுவோம்

அன்பு செய்து பாருங்கள்
அகங்காரம் அழிந்திடும்
அன்பு ஒன்றே உலகிலே
ஆற்றல் மிக்க ஆயுதம்

அன்பை வெல்லும் கருவிகள்
அகில மெங்கும் இல்லையே
அன்பே நம்மைக் காத்திடும்
அதனைப் போற்றி வாழ்வமே

உயிர்கள் மீது அன்பினை
உணர்வு பொங்க செலுத்துவோம்
உயிர்கள் எல்லாம் ஒன்றென
உணர்ந்து போற்றி மகிழுவோம்

அன்பும் அறனும் வேறென
அறிவிலாதார் செப்புவர்
அன்பே தெய்வம் ஆதலால்
அதனைப் போற்ற வேண்டும் நாம்

அன்பும் அறனும் உடையதே
ஆற்றல் மிக்க வாழ்க்கையாம்
அன்பு கொண்டு வாழுவோம்
அதுவே நமக்கு நல்லதாம்

அன்பு தெய்வம் என்பதை
அறிந்து போற்றி வாழுவோம்
அன்பினாலே அனைத்தையும்
அடைந்திடலாம் பிள்ளைகாள்

அன்பிலாதார் வாழ்க்கையை
அறவோர் இகழ்ந்து அகற்றுவர்
அன்பினாலே அனைத்தையும்
ஆக்க முடியும் பிள்ளைகாள்

அன்பு செய்து பாருங்கள்
அன்பு நம்மைக் காத்திடும்
அன்பே கடவுள் ஆதலால்
அன்பைப் போற்றி வாழுவோம்

கப்பல் துறை

2009-03-09T15:09:00.000-07:00

கப்பல் துறை எங்கள் துறை
கன்னித் தமிழர் வாழ்ந்த துறை
கலம் செலுத்தி தமிழ் இளைஞர்
காவியம் படைத்த துறை

சரசோதி மாலை என்னும்
சாஸ்திர நூல் தந்த துறை
சரித்திரப் புகழ் வாய்ந்த
தம்பையின் கப்பல்துறை

பழம் பெருமை கொண்ட எங்கள்
பார் புகழும் தம்பை நகர்
வளம் பெருகச் செய்த துறை
வள மார்ந்தகப்பல் துறை

பதினோராம் நூற்றாண்டில்
பராக்கிரம பாகு என்பான்
கரந்துறைந்து வாழ்ந்த துறை
கழனி சூழ் கப்பல்துறை.

முத்துக் குளித்த துறை
முத்தமிழ் வளர்த்த துறை
வித்தகர் பலர் சேர்ந்து
வெற்றியுடன் வாழ்ந்த துறை.

பாண்டியன் ஆண்ட துறை
பல்கலையும் செழித்த துறை
மாண்புறு தமிழரன்று
மகோன்னதமாய் வாழ்ந்த துறை

அரசுகளின் போர் வெறியால்
அன்றழிந்த கப்பல் துறை
தரணியிலே சிறந்த துறை
தம்பை தந்த கப்பல்துறை

வளமார்ந்த எங்கள் துறை
வரலாற்றை நாமறிவோம்
உளமார்ந்த மகிழ்ச்சியுடன்
ஊர் பேரைப் போற்றிடுவோம்.

சிந்தனையைப் போற்றுவோம்

2009-03-05T22:30:00.000-08:00

காக்கை ஒன்று மரத்திலே
முட்டை விட்டுக் காத்தது
பார்த்துப் பாம்பு ஒன்று வந்து
கொத்திக் குடித்துக் சென்றது.

வேளை தோறும் நடக்கும் இந்த
வேதனையைத் காக்கையார்
மூளை கொண்டு தடுத்திட
முயன்று வெற்றி கொண்டனர்.

அந்த நாட்டு மன்னனின்
அருமை மனைவி குளிக்கையில்
நல்ல தருணம் பார்த்துக் காகம்
நகைகையக் கௌவிச் சென்றது

அரசி நகையைக் காக்கையார்
அந்தப் பொந்தில் போட்டனர்
விரைந்து வந்த வீரர்கள்
மரத்தைத்தறித்து வீழ்த்தினர்

பொந்தில் இருந்த பாம்பனார்
பொங்கி எழுந்து சீறினார்
அந்த வேளை வீரர்கள்
அரிந்து பாம்பைக் கொன்றனர்.

புத்தியாலே காகம் இந்தப்
புதுமைதனைச் செய்தது
சித்தி கொள்ள நாமுமந்த
சிந்தனையைப் போற்றுவோம்.

கணினி

2008-12-13T07:04:00.000-08:00

கணினி என்ற கருவி யொன்று
கருத்தில் தோன்றுதே இதைக்
கவனி என்று உலகம் இன்று
பரணி பாடுதே.

மனித மூளை என்று இதனை
அறிஞர் போற்றுவார்
புனிதமான இதனைப் போற்றிப்
புலமை பெறுவமே.

கல்வியிலே நிறைவு காண
கணினி உதவுமே
பல்கலையும் பயின்றிடவே
இதனைப் பயிலுவோம்.

கீ போட்டால் இன்று வாழ்வு
கீர்த்தி பெருகுதே
மௌசைத் தூக்கும் கரங்களினால்
மகிழ்ச்சி தோன்றுதே.

ஆற்றல் மிக்க கருவி யிது
அறிந்து போற்றுவோம்
ஏற்ற முண்டு வாழ்விலே
எங்கள் தோழரே.

மேற்குலகில் வளரும் கலைகள்
விரும்பிக் கற்போம் நாம்
ஏற்றமுற வழி இதுவே
எங்கள் தோழரே.

கவிதை - வேலாயுதம்.தங்கராசா

விழாவும், பாராட்டும்... திருகோணமலை ஸ்ரீ கோணலிங்க மகாவித்தியாலயம்

2008-12-06T18:09:00.000-08:00

இலங்கையின் திருகோணமலை மாவட்டத்தில் லிங்கநகர் பகுதியில் தி/ஸ்ரீ கோணலிங்க மகாவித்தியாலயம் அமைந்துள்ளது. நகரின் புறத்தே பெரும்பாலும் வசதிகுறைந்த மாணவர்கள் கல்விகற்கும் இப்பாடசாலை 1977 ஆம் ஆண்டு பிரம்ம ஞானி ஸ்ரீமத் சுவாமி கெங்காதரானந்தா மகராஜ் அவர்களின் ஆலோசனையின் பேரில் அமைக்கப்பட்டது.

தற்போது சுமார் 430 மாணவர்கள் கல்விகற்கும் இப்பாடசாலையில் 2008ஆம் ஆண்டிற்கான நவராத்திரி விழா அதிபர் திரு.க.ஜெயநாதன் தலைமையில் மிகச் சிறப்பாக நடைபெற்றது. இவ்விழாவில் பல்வேறு கலைநிகழ்ச்சிகள் நடைபெற்றதோடு முதன்மை விருந்தினராக அழைக்கப்பட்டிருந்த , இலங்கை அதிபர் சேவையில் தரம் ஒன்றில் கடமையாற்றி ஓய்வு பெற்றவரும், தங்கநிலா வலைப்பூவின் ஆசிரியருமான திரு.வேலாயுதம் தங்கராசா பொன்னாடை போர்த்திக் கௌரவிக்கப்பட்டார்.

அந்நிகழ்வுகளில் இருந்து சில பகைப்படங்கள் இங்கே..

முதன்மை விருந்தினர் வரவேர்ப்பு

அதிபரின் தலைமையுரை நிகழ்கிறது.

முதன்மை விருந்தினர் பொன்னாடை போர்த்திக் கௌரவிக்கப்படுகிறார்.

மாணவர்களின் கலைநிகழ்சிசிகளில் சில

விழாவில் சிறப்பாக கடமையாற்றிய கிறிஸ்தவ ஆசிரியருக்கு பாராட்டுப்பத்திரமும், பரிசும் வழங்கப்படுகிறது.

கலைநிகழ்சிசிகளில் சில

இடமிருந்து வலமாக பிரதி அதிபர் திருமதி வி.அன்பழகன், சிறப்பு விருந்தினர் திருமதி தி. துரைரெத்தினம், முதன்மை விருந்தினர் திரு.வேலாயுதம் தங்கராசா அதிபர் திரு.க.ஜெயநாதன் ஆகியோரைப் படத்தில் காணலாம்.

கணிதம் கற்று உயர்வாய்…

2008-11-30T13:20:00.000-08:00

கணக்கு வரா தென்று
கவலைப்படும் மகளே
கருத்து ஒன்று சொல்வேன் நீ
கவனமாகக் கேளு

கணக்கு வராதென்று
கவலைப்பட்ட சிலபேர்
கணக்கில் மேதையாக
வந்த கதைகள் உண்டு

தெய்வம் நம்முன் தோன்றி
செல்வம் தருவதில்லை
முயற்சி என்றும் வாழ்வில்
இகழ்ச்சி அடைவதில்லை

கடுமையான உழைப்பில் நீ
கவனம் செலுத்த வேண்டும்
பெருமை உனக்கு வந்து
பேரும் புகழும் சேரும்

மனத்தைக் கணக்கில் வைத்து
மகிழ்ச்சியோடு கற்றால்
வருமே உனக்குக் கணக்கு
வாழ்வும் வளமும் பெறலாம்

இதயம் எதிலும் தோய்ந்தால்
ஏற்றமுண்டு மகளே
உதயமாகும் வாழ்வு இந்த
உண்மை புரிந்து பாடு

சாதனைகள் படைத்தோர் இந்தச்
சங்கதிகள் அறிவார் நல்ல
போதனைகள் கேளு இதைப்
புரிந்து கொண்டு பாடு

முயற்சி என்றும் வாழ்வில்
முடங்கிப் போவதில்லை
உயர்ச்சியுண்டு மகளே நீ
உணர்ந்து வெற்றி கொள்ளு

எண்ணும், எழுத்தும் வாழ்வை
ஏற்றங்காணச் செய்யும்
கண்ணின் மணியே நீயும்
கணிதம் கற்று உயர்வாய்.

கவிதை - வேலாயுதம்.தங்கராசா

ஆண்டவனைக் கண்டதுண்டா?

2008-11-24T19:35:00.000-08:00

ஆண்டவனைக் கண்டதுண்டா?
அருமையண்ணா கேட்டனன்
ஆகா உண்டே என்று அவன்
அருமைத் தங்கை கூறினள்

எங்கே கண்டாய் என்று அவனும்
ஏளனமாய்க் கேட்டனன்
எங்கு முண்டே என்று அவள்
எழில் ததும்பக் கூறினள்

அன்னை பிதா வீட்டிலே
ஆண்டவராய் உள்ளனர்
உண்மைக் கல்வி ஊட்டுகின்ற
உங்கள் குருவும் கடவுளே

தெய்வம் எங்கும் உண்டெனும்
தெளிவு வேண்டும் மனதிலே
உய்வம் வாழ்வில் என்றவள்
உணர்ச்சியோடுரைத்தனள்

செய்யும் தொழிலில் தெய்வத்தைத்
தேடவேண்டும் நாமொல்லாம்
உய்யும் வழி அதுவொன்றே
உயர்வு பெற்று வாழலாம்.

கவிதை - வேலாயுதம்.தங்கராசா

மனிதனும், மிருகமும்

2008-10-16T07:21:00.000-07:00

உணவு தேடிக் காக்கையார்
ஊரைக் கூட்டி உண்ணுவார்
பணத்தைத் தேடி மனிதர் நாம்
பதுக்கி வைத்து வாழ்கிறோம்.

பாலில் நீரை நீக்கியே
பருகவல்லார் அன்னத்தார்
மாவில் கலப் படங்கள் செய்து
மற்றவர்க்குக் கொடுக்கிறோம்.

தேடி அலைந்து சத்துணவைத்
தேனீ நமக்குத் தருகிறார்
நாடி நாம் மற்றவர்க்கு
நன்மை புரிய முயன்றிலோம்.

வயலைப் பூச்சி அழித்திடாமல்
வெட்டுக்கிளியார் உதவுவார்
மயிலைப் பிடித்து சிறகொடித்து
மகிழ்ந்து நாமும் வாழ்கிறோம்.

பாலைத் தந்து நமதுடலைப்
பசுவார் பேணி வளர்க்கிறார்.
ஆடு மாடு விரும்பியுண்ணும்
அறிவிலியாய் வாழ்கிறோம்.

இரக்கம் நமது உள்ளத்தில்
இருக்க வேண்டும் தம்பிகாள்
சுரக்கும் அருள் இறைவனும்
தோன்றி நமக்கு அருளுவார்.

கவிதை - வேலாயுதம்.தங்கராசா

வாழ்வாங்கு வாழும் வழி

2008-09-20T23:02:00.000-07:00

விடியற்காலை நாலு மணிக்கு

விழிக்க வேண்டும் தோழரே

கடிதிற் காலைக் கடன்கள் முடித்து

கடவுள் பாதம் தொழுவமே

சிறிது நேரம் தியானம் செய்து

சிந்தனையை வெல்லுவோம்

அரிது இந்தப் பிறவி நமக்கு

அதனைப் போற்ற வேண்டுமே

ஒழுக்கமாக வாழ்வ தொன்றே

உலகில் உயர்வு தந்திடும்

பழக்கம் நல்லதாயின் இந்தப்

பார் புகழும் நம்மையே

சத்தியத்தைக் கடைப்பிடித்து

சான்றோராக வாழலாம்

நித்தியமாய் வாழ்ந்துலகில்

நிறையப் புகழைச் சேர்க்கலாம்

வாழ்வாங்கு வாழும் வழி

வாழவேண்டும் தோழரே

நாளும் கோளும் உதவுமே

நாமும் சிறந்து வாழலாம்.

கவிதை - வேலாயுதம்.தங்கராசா

வேளை தோறும் பண்புகள்

2008-09-12T04:59:00.000-07:00

பாலர் நாங்கள் கூடி நின்று
பாடிப் பாடி ஆடுவோம்
தோழர் ஒன்றாய்க் கூடுவோம்
சுறு சுறுப்பாய் ஓடுவோம்

தேவை நமக்கு உடல் நலம்
தினமும் அதனைப் பேணணும்
பாவை போலச் சுழன்று ஆடிப்
பரவசமும் அடையணும்

காலை நேரம் எழுந்ததும்
கடவுள் நாமம் சொல்லுவோம்
மாலை முழுதும் விளையாடி
மகிழ்ச்சியோடு வாழுவோம்

அன்னை பிதா தெய்வமாம்
ஆசிரியரும் தெய்வமாம்
எம்மைக் காக்கும் தெய்வத்தை
என்றும் தொழுது போற்றுவோம்

நாளை உலக நாயகர்
நாங்கள் என்று சொல்லுவோம்
வேளை தோறும் பண்புகள்
வேண்டிக் கற்று உயருவோம்

கவிதை - வேலாயுதம்.தங்கராசா

உனக்குள் ஒன்றுண்டு

2008-09-12T02:01:00.000-07:00

உனக்குள் ஒன்றுண்டு இதை
உணர்வாய் நீ நன்று
உனக்குள் உள்ள ஒன்றே இந்த
உலகில் எங்குமுண்டு

சத்தியம் என்றிதனைச்
சான்றோர் சொன்னதுண்டு
நித்திய வாழ்வுண்மை இதை
நீதான் அறிந்துணர்வாய்

கண்டவர் விண்டிலரே இது
கற்பனை இல்லை தம்பி
மீண்டவர் வந்துலகில் இதன்
விபரங்கள் சொன்னதுண்டு

கடவுள் என்றொருவர் தனியே
காட்சி கொடுப்பதில்லை
கடவுள் நமக்குள் உண்டு இதைக்
காண்பார் நம்மில் இல்லை.

உள்ளொளி காண்பாயே தம்பி
உயர்வு உனக்கு உண்டு
வெள்ளம் போல் வருமே தம்பி
வெற்றி மேல் வெற்றி

உனக்குள் உள்ள ஒன்றை நீ
உணர வேண்டும் தம்பி
தன்னை அறிந்தவரே இந்தத்
தரணி போற்ற வல்லார்

முதிசம் நமக்குண்டு இது
மூத்தோர் சொன்ன மொழி
கவசம் அதைப் பணிந்து நாம்
காண்போம் புது வாழ்வு.

கவிதை - வேலாயுதம்.தங்கராசா

வாழும் வழி தெரியணும்

2008-09-07T07:17:00.000-07:00

ஆலமர நிழலிலே
அழகு மிகு பூனையார்
கோலமிடும் மங்கை போல்
குனிந்து நின்று முகர்ந்தனர்

எலியின் வாடை அடிக்கவே
ஏப்பம் வேறு விட்டனர்
சலிப்பில்லாமல் ஆலம் சருகிலே
சரிந்து கண்ணை மூடினர்

சிறிது நேரம் சென்ற பின்
சின்னப் பொந்தில் இருந்து ஓர்
எலியார் எட்டிப் பார்த்தனர்
எவருமில்லை என்றெண்ணி

மெல்ல வெளியே வந்தனர்
மேவி நாலு திசையிலும்
பொல்லாப் பூனை இருப்பதை
புரிந்திடாமல் அலைந்தனர்

மின்னல் வேகப் பாய்ச்சலில்
வீரப் பூனை பாய்ந்தனர்
என்ன செய்வோம் ஐயகோ!
எலியார் பூனை வாயிலே

கண்ணை மூடிப் படுப்பினும்
கயவரோடு கவனமாய்
மண்ணில் வாழப் பழகனும்
வாழும் வழி தெரியணும்.

'ஆண்டவனைக் கண்டதுண்டா?'
(சிறுவர் கவிதை நூல்)

திரு.வேலாயுதம் தங்கராசா அவர்கள் திருகோணமலையில் உள்ள தம்பலகாமம் எனும் கிராமத்தைப் பிறப்பிடமாகக் கொண்டவர். ஓய்வு பெற்ற அதிபர், பேராதனைப் பல்கலைக்கழக வெளிவாரிப்பட்டதாரி, தேசிய கல்வி நிறுவகத்தின் பட்டப்பின்படிப்பை முடித்தவர். வரலாற்றுப் புகழ் மிக்க தம்பலகாமம் ஆதிகோணநாயகர் கோயிலில், மரபுவழி அறக் காவலர்களில் ஒருவராகக் ‘கங்காணம்’ என்னும் உயர் பதவி வகிப்பவர்.

தம்பலகாமத்தின் மூத்த எழுத்தாளர் திரு.க.வேலாயுதம் அவர்களின் அன்புமகனாகிய இவர், இளம்வயதில் இருந்தே எழுதுவதில் அதீத ஆர்வமுள்ளவராக இருந்து வந்துள்ளார். இவரது பல இலக்கியப் படைப்புக்கள் வாரப் பத்திரிகைகளிலும், சஞ்சிகைகளிலும் வெளிவந்துள்ளது. இவரது 'ஆண்டவனைக் கண்டதுண்டா?' என்னும் சிறுவர் கவிதை நூல் சிறுவர்களது மனங்களில் நற்பண்புகளை வளர்க்கும் நோக்கில் அமைந்துள்ளது.

திரு.வை.கீதபொன்கலன்.

தி/புனித பிரான்சிஸ் சபேரியர் ம.வி,

திருகோணமலை.

முழு மனிதராகுவோம்

2008-09-06T05:52:00.000-07:00

இந்து, யேசு, புத்தர், என்று
எதற்குச் சண்டை தோழரே
இறைவன் ஒன்று என்னும் தீபம்
ஏற்ற வேண்டும் எங்குமே

மதங்கள் மூலம் பகைமையை
மனிதர் வளர்த்துக் கொண்டனர்
உதங்கர் போன்ற ஞானிகள்
உண்மை உணர்ந்து உயர்ந்தனர்

உள்ள தெய்வம் ஒன்றெனும்
உணர்வு வேண்டும் நம்மிடம்
கள்ள மனதை வென்று நாம்
கருணை பொங்க வாழ்வோமே

மனிதசேவை தன்னையே
மதங்கள் யாவும் போற்றுமே
புனித சேவை புரியவே
பூணவேண்டும் விரதமே

இந்து என்றும் இஸ்லாம் என்றும்
எதற்குச் சண்டை நம்மிலே
முந்துவோமே பணி செய்ய
முழு மனிதராகுவோம்.

கவிதை - வேலாயுதம்.தங்கராசா